政壇：前高官離熱廚房輕鬆晒
依家從政猶如入熱廚房，唔想捱，不妨學吓班高官急流勇退。早幾日下午四點幾鐘，喺中環見到人稱「D姐」嘅公務員事務局前局長俞宗怡、前申訴專員黎年、工業總會前行政總裁Dennis邱達宏同律師葉宏德喺置地廣場門口等車，期間四人有傾有講，一派輕鬆。後來有架房車嚟到，除咗葉宏德之外，其餘三人齊齊上車離去。
黎年（前左起）、俞宗怡、葉宏德及邱達宏（後）飯後喺置地廣場外候車，期間有講有笑。
呢個組合都幾新鮮，即刻致電Dennis問清楚。Dennis笑笑口話，佢哋四個係多年老友，亦係一齊打高爾夫球嘅波友，感情好好，不時相聚食飯，當日只係例牌飯聚，冇乜特別話題喎！咦？食晏食到四點幾鐘，唔通真係齋吹水？佢聽罷哈哈大笑話，係呀！因為今次聚後大家各有各忙，預計八月份先至有時間再聚，所以咪傾到難捨難離囉！
當日見D姐翹埋雙手企喺前排中間，大家姐風範不減。黎年就一路雙手插褲袋，心情靚唔使多講。估唔到呢兩位高官離開官場後，日子真係輕鬆寫意。
