政壇：西九十一月再搞藝術節

西九文化區嘅興建費嚴重超支，但就仲未知幾時先可以起好，塊地喺度曬草皮真係好嘥。西九文化區管理局董事局尋日開會，通過「自由野2014」計劃，為期兩日嘅戶外藝術節連續第三年舉行，將於十一月上演。咁都好，畀公眾有得參與吓。

連納智

董事局仲聽取咗西九文化區各建築項目嘅最新發展報告，包括戲曲中心興建情況、M+設計進展、工地前期工程同地基工程招標評審、西九公園概念設計同小型藝術展館大綱設計、委聘演藝劇場設計團隊等事宜。

西九行政總裁連納智話，收集公眾對將來西九公園使用及管理意見的「西九公園，人人共享」意見調查將喺六月二十九日結束，調查結果將會作為起草西九公園附例嘅參考喎！

董事局亦備悉立法會監察西九小組委員會最近曾討論過西九嘅財務狀況、推展西九文化區綜合地庫、西九諮詢會角色及職能、發展文化軟件等事項。