政壇：梁君彥耍兩招KO泛民
泛民主派發起嘅拉布戰已經唔再只係局限喺立法會大會，而係極速擴散，就連工務小組、財務委員會同各個事務委員會都唔放過，尋日仲殺入內務委員會添，拉布簡直好似無孔不入、無處不在，無日無之。
設計圖片
話說立法會財務委員會主席「星爺」吳亮星主持會議進退失據，將新界東北發展前期工程研究撥款申請搞到一團糟，班泛民議員不斷提出規程問題同埋動議嚟拉布，但星爺就剪極都剪唔到布，連建制派議員都埋怨佢，點解處理手法咁差。相反內會主席Andrew梁君彥尋日同樣面對議員范國威同「阿毛」毛孟靜展開「拉布」式追問，但佢就以幾句說話成功「KO」（擊倒）兩人，表現可謂高下立見。
內會首先討論八月份嘅以色列外訪之旅，團長方剛話合共有十二位議員報名參加，又透露屆時會有兩名創新科技署官員隨團。點知阿毛一聽到要同政府官員一齊去，即刻追問Andrew點解要矮化立法會地位喎，確係莫名其妙。Andrew於是使出一招「四両撥千斤」，叫曾經同環境局局長黃錦星一齊去過韓國訪問嘅議員何秀蘭解答問題，搞到阿毛冇聲出。
一句散會搞掂范國威
之後輪到范國威接力，佢以自己係「新議員」為由，不斷向Andrew提出規程問題，更加喺其他事項臨時提出問題，最終Andrew以一句「我已經宣布散咗會」擋駕，任憑范國威點樣大鬧，Andrew都無理佢，真係夠晒主席威嚴。
