流年不利事不順 家人受累最無辜
今時今日，做政客難，做特首更難，做特首嘅家人難上加難。唔係誇張，香港愈來愈政治化，社會愈來愈偏激，唔止特首成為眾矢之的，特首家人一樣要承受巨大壓力，意志唔夠堅強都幾難頂得住。
呢，留學英國嘅梁振英大女梁齊昕尋日喺社交網站上載兩張疑似自殘相片，其中一張左手腕有兩條血痕，英文留言係「我會失血致死嗎？」另一張手背沾滿血漬，標題係「我喜歡血」，真係睇見都心酸。
據講，梁齊昕性格剛烈，愛抱打不平，加上年少氣盛，見到父親面對議員辱罵及議會暴力而無從還擊，已經覺得「好唔開心、好唔順氣」，加上早前喺社交網站討論時事而遭網民圍攻謾罵，令佢承受極大壓力，負面情緒抑壓多月，最後忍無可忍，懷疑透過自殘宣洩。
係人都知，家陣香港立立亂，政治人物一啲都唔易做，尤其特首更加係動輒得咎，所以，佢本身固然要有堅強意志，而家人亦要有承受壓力嘅心理準備，否則隨時崩潰都似。正如網上潮語話齋，「認真便輸了」，如果將所有批評都擺上心，盞自己受苦受罪咋。正所謂，螻蟻尚且偷生，自殘始終都係不智，徒令親者痛仇者快。
即係咁，從政者嘅家人成為社會焦點，一言一行都受到關注，呢個情況唔係香港獨有，全世界都係一樣。好似國家主席習近平咁吖，上台之後即刻要求喺美國讀書嘅女兒回國，就係希望避免授人以柄。又好似台灣前總統陳水扁咁吖，兒子被踢爆召妓醜聞，佢自己衰咗事小，佗衰父親事大。香港嘅情況比大陸及台灣更加複雜，施政更加困難，特首要承受各種明槍暗箭，佢嘅家人自然亦要面對各種壓力，呢啲可以講係從政者嘅代價，亦可以講係從政者家人嘅不幸。
話時話，梁振英生肖屬馬，今年犯太歲，早就有人批佢流年不利，諸事不順，果然一語成讖。木秀於林，風必摧之，今日香港躁動不安，立法會內有內互鬥，外有外示威，搞到滿城風雨，永無寧日，梁振英首當其衝，點可能有好日子過吖。咁講喇，政治人物樹大招風，惹來批評及攻擊一啲都唔出奇，但無論點都好，禍不及妻兒，攻擊者連特首嘅家人都唔放過，除咗網上圍攻欺凌，甚至出言恐嚇，咁就實在太離譜喇。
講開又講，香港進入多事之秋，風雨不停，爭拗不絕，流年不利嘅又點止特首吖，睇唔開嘅又點止特首千金吖，七百萬人都就嚟谷爆喇，叮！
