城中鏡：虧損增9倍 證監會洩洪
坐擁七十幾億元，被指「水壓」過高嘅證監會，終於勁蝕啦！證監會年度交易徵費多得個市旺，升百分之九點五突破十億元，但係年度虧損就爆升九倍，勁蝕超過一億三千八百萬元，對於一直有「洩洪」壓力，被要求再減、甚至暫免交易徵費嘅證監會嚟講，可能反而係好事，但導致見紅嘅主要原因，係嚟自薪酬支出。
證監會CEO歐達禮年薪減三十八萬元。
證監會年報顯示，人工支出八億九千五百萬元，較對上一年多咗一億四千萬銀。喺呢個年度，直屬證監會員工七百五十三名，而證監會兩大巨頭、正副CEO歐達禮同張灼華都算識做，前者年薪減咗三十八萬去到九百零三萬一千、後者只加十四萬，到六百八十四萬七千元，即係錢主要係加响前線同新請員工度，而年度內執法行動亦確實明顯多咗，證監會成功打「烏蠅、老虎」，都交到成績。
金融服務界議員張華峰好公道，話現時薪酬市況，人手人工無辦法唔加，只希望證監會可以照顧中小證券行利益，研究再減徵費，同其他方法幫助刺激個大市成交啦。
證監會的盈餘儲備減少百分之一點八，到七十三億一千六百萬元，係開支嘅五點四倍。根據《證券及期貨條例》第396條，當證監會儲備超過該年度預算營運開支兩倍，須提出減低交易徵費率或款額建議。
