政壇：搞搞政：掌專委會 易失選票 田二少心大心細
港鐵同政府分別就高鐵超支風波成立調查委員會追查事件，尋日到立法會議員要求第三路追殺，提交呈請書要求成立專責委員會（專委會）調查誰是誰非。聽聞唔少建制派同政府官員，都想推舉新民黨副主席「田二少」田北辰擔任專委會主席，貪佢熟悉鐵路運作，可以坐鎮大局，但據聞田二少仍然心大心細未有決定。
設計圖片及對白
專委會要徹查高鐵延誤及超支，相信係件浩瀚工程，令成個高鐵專委會分分鐘變成「翻版雷曼事件」，查足兩年都變成無米粥。正係呢個原因，令唔少想加入專委會嘅議員卻步，恐怕花費太多時間，特別係建制派議員，萬一高鐵醜聞愈爆愈多，到時都唔知鬧唔鬧好。
不過，建制派同政府為免專委會主席之位由泛民議員操控，據聞有意「欽點」田二少幫手捱義氣做主席，但聽講佢至今未肯應承。其實都唔難理解，因為無論邊個做主席都冇得向高鐵「發炮」，少咗曝光就非常唔抵，更可能流失埋選票，隨時變咗死亡之吻添！
如果田二少唔肯做，建制派內都仲有一、兩名大熱主席人選，包括身兼工務小組主席嘅工程界議員盧偉國，佢話如果有人認為佢適合做主席，佢都會願意出任。由於調查高鐵好可能涉及複雜法律事宜，所以應該搵位有法律背景人士出任，所以本身係大律師嘅廖長江亦喺名單之上。廖長江好老實話從來唔爭做乜做物，但假如有人認為佢適合出任主席，佢一定會認真考慮喎！
