政壇：騰訊辦公室滑梯供玩樂
IT公司為推動員工創意，好多時都有搞鬼嘅設計，Google喺矽谷嘅總部Googleplex，據講甚至設有「空中飛人」課程，供員工在公餘修煉！作為內地科網巨頭嘅騰訊自然唔輸蝕，騰訊為旗下微信同QQ郵箱而設，喺廣州嘅研發中心，不單止有齊花園、餐廳、健身室等「標準」設備，最好玩嘅設計，係一條兩層樓高嘅滑梯，等員工可以跣出刺激創意。
騰訊廣研中心有一條兩層樓高嘅滑梯。
呢個位於廣州TIT創意園區（廣州紡織機械廠嘅原址）嘅Office，騰訊內部稱作廣研中心，一萬平方米嘅面積，佔了TIT創意園區嘅六幢大樓。廣研中心與TIT創意園區，依家已成為廣州舊建築活化嘅代表項目之一，有評論甚至形容廣研中心似文化地標多過IT巨企嘅辦公室添！
廣研中心喺舊年已投入運作，作為微信業務嘅基地，當然唔會隨便對外開放啦！不過如果大家有興趣睇真啲個內部設計，騰訊自家嘅騰訊地圖輸入「TIT創意園B4」，就可以搜尋到呢個園區嘅實境圖片，除咗呢個咁搞鬼嘅滑梯外，就連洗手間嘅內部都可「參觀」。
