城市規劃委員會舊年批准將山頂盧吉道二十七號一座有近百年歷史嘅住宅改建為酒店，有立法會議員就好擔心如果住宅改建為酒店，盧吉道呢條行山徑會出現人車爭路情況。平時有行開山嘅議員「阿王」王國興就話，平時都有同太太行盧吉道晨運，建議酒店改用人力車，咁就安全又環保喎！

王國興平時會同太太行盧吉道晨運。

由於盧吉道係唯一通往酒店嘅通道，但因為地區人士反對，有關申請人已建議喺假日多人行山嘅時段，該路段唔用車，而餘下行人稀疏嘅時段就用迷你電動車運送酒店住客、員工、服務承辦商同貨物。雖然係咁，唔少議員都仲好擔心行人安全問題。

阿王就話盧吉道最熱鬧其實係朝早晨運時間，建議酒店將計劃用嘅電動車改為有傳統特色嘅人力車，咁就又安全又環保，相信仲可以吸引遊客，幫助旅遊業咁話。如果酒店真係用人力車運貨上山，相信佢哋都要搵多啲有氣有力嘅車伕先得喇！

第一手消息請下載on.cc東網iPhone/iPad/Android/Windows Phone Apps