政壇：泛民鬧樂施會抄橋仲聲大夾惡

泛民主派早前搞咗個「毅行爭普選」活動，行勻港九新界宣傳「六二二民間全民投票」。樂施會上周四就發表聲明，澄清「毅行爭普選」同該會主辦嘅「樂施毅行者」遠足籌款並無關係，但點知被泛民上綱上線，批評佢哋同民主派劃清界線，仲話唔會再捐款畀樂施會，搞到該會總裁余志穩要喺網誌度向泛民「耍冧」。

其實「樂施毅行者」個名一早已經註冊，就算泛民唔係侵權，都係抄橋啦，竟然仲喺度聲大夾惡。

樂施會上周四一出聲明就挑起咗泛民神經，仲發起網上聯署行動，要求樂施會向「毅行爭普選」參加者致歉。余志穩尋日就喺樂施會博客上向泛民「耍冧」，話當時發出聲明純粹係希望回應公眾查詢，令公眾知道「毅行爭普選」活動並非樂施會主辦，絕無其他考慮，亦冇受到壓力。