政壇：古董車跪低 盧偉國返立會遲到
立法會工務小組委員會主席WK盧偉國，喺尋日朝早委員會開會時遲大到，仲要由該委員會副主席梁志祥代為主持近半小時，莫非WK因為睇波唔知醒去開會咁離譜？
盧偉國架中古保時捷行駛途中「跪低」，搞到開會遲大到。（資料圖片）
原來WK遲到係因為佢架中古跑車喺駛往立法會途中「跪低」，即時要搵拖車公司，又要周圍打電話求救，幸好有路過嘅警察協助，加上佢細佬咁啱又喺附近，所以先有人載佢返立法會開會咋！
今次拋錨嗰架車，就係我哋以前提過嗰架八八年出廠嘅中古保時捷，但WK話自己從機械工程師嘅角度嚟睇，呢架車嘅機件係無車能及，雖然仲係棍波再加冇風油軚，但佢嗰種Classic（古典）味道好難再喺依家啲新車搵到，所以一定唔會劏架車喎。WK仲話架車平時都好乖仔，今次咁奀皮可能只係因為佢呢個幾月經常留喺立法會，冇時間撻吓架車，佢希望盡快整番好架車，希望太太唔會詐型喎。
