政壇：長毛 張超雄 賊喊捉賊

被下達禁令嘅包括社民連「長毛」梁國雄兩位助理、張超雄兩位助理同「慢必」陳志全一位助理，由於長毛仍然坐緊監，尋日張超雄、慢必同陳偉業就出嚟抗議，批評行管會代入法庭角色，更加係「未審先判」。長毛仲喺獄中寫信畀立法會主席曾鈺成，話措施無理限制議員助理享有嘅權利，考慮會就此提出司法覆核。

就咁聽，幾位議員好似好有道理，但睇番過去多個星期發展，就知道唔少議員助理都濫用緊佢哋應有權利，隨時幫出面嘅示威者裏應外合，所以尋日幾位議員走出嚟批評行管會，同賊喊捉賊無分別。曾鈺成都講過，有議員助理曾經一次過申請二十幾張訪客證，等二十幾名示威者可以神不知鬼不覺混入立法會大樓，都咪話唔危險。

拍卡測試可通往地方

況且我哋日前都有報道過，社福界議員張國柱其中一名議員助理，曾經喺審議新界東北發展前期撥款期間，突然走訪立法會大樓每一層樓，不停用議員助理專用證件「拍卡」，測試吓議員助理可以通往幾多度地方，呢種做法好難令人唔懷疑佢係咪想「偷運」示威者進入大樓內。

試問如果唔係呢啲議員助理做埋啲咁嘅嘢，次次都想渾水摸魚，否則行管會又點會禁止佢哋進入呢？行管會呢個措施，只係想預防再有示威者成功「混入」立法會大樓，目的係避免不必要混亂。