太平紳士分豬肉 荷蘭水蓋大貶值
喺港英殖民地年代，太平紳士係一種身份象徵，獲得委任嘅人就算唔係德高望重，都係社會賢達，唔係咁輕易攞o架。不過回歸後，港產荷蘭水蓋大貶值，係又派，唔係又派，太平紳士早就今非昔比咯。
即係咁，雖然荷蘭水蓋大貶值，但一樣咁多人爭，呢個世界沽名釣譽嘅人始終唔少。嗱，港府將太平紳士銜頭當禮物亂咁派，近年唔止港人有份，就連內地人都有份，好似華潤集團前董事長宋林咁，舊年七一獲頒太平紳士銜，點知幾個月後就因涉嫌嚴重違紀而被中央免職調查，簡直諷刺。今年七一將至，你估最新一份太平紳士名單會有幾多個新宋林吖嗱？
太一叮唔係亂講o架，本報翻查資料，發現近年愈來愈多中資機構高層獲港府委任各項重要公職及頒發各類勳章銜頭，尤其「入場門檻」較低嘅太平紳士，充斥內地權貴，簡直係「一片紅」。名不正，言不順，呢批中企高層雖然好多已經攞咗三粒星，但係講到對香港嘅忠誠、貢獻及聯繫咯喎，佢哋有邊樣合格呢？咁嘅委任點叫人信服呢？
大家可能覺得好奇怪，點解港府委任咁多內地權貴做香港太平紳士，其實，大家唔需要覺得奇怪，事關現行嘅太平紳士制度千瘡百孔，根本無規定獲委任者須為香港居民，而法例雖訂明太平紳士須符合居港限制，但係有關法例咁多年來從未執行，形同虛設。難怪有學者直斥有關做法極不理想，要求港府褫奪一啲與香港已無密切聯繫、甚至可能損害香港聲譽人士嘅紳士名銜。
講到呢度，真係令人啼笑皆非，港府委任內地權貴做香港太平紳士已經夠離譜，而內地權貴對港英殖民地遺留落嚟嘅荷蘭水蓋甘之如飴，更加令人難以置信。就以宋林為例吖，一個共產黨高官居然成為極具殖民地色彩嘅太平紳士，你話成何體統？如果英女王畀個爵士銜頭佢，唔通佢都接受咯喎？共產黨員應該堅守信仰至係o架，正如佛教徒食齋、回教徒唔食豬肉咁，點可以來者不拒o架！
冇計喇，又好難怪內地權貴虛偽嘅，前特首曾蔭權夠話效忠中央喇，咪一樣對英國爵士銜頭戀棧不捨。喺貪曾嘅發揚光大下，每年七一授勳已經淪為政治酬庸平台，太平紳士更加淪為呢場分餅仔遊戲中嘅餅碎，大家唔使咁認真。好似「曾朋友」李國寶嘅兩個仔李民橋同李民斌，居然可以獲委任為太平紳士，你話佢哋何德何能吖？總而言之，太平紳士不紳士，以後每年七一授勳，大家咪當睇笑話囉，叮！
