城中鏡：郭台銘呻台灣請人難
iPhone 6今年上市，鴻海攞到張大單，盛傳要喺內地請多十萬個員工，大老闆郭台銘日前又預告，會喺近日正式宣布一連串喺台灣擴大投資嘅計劃，但佢隨即又呻，依家喺台灣人才難求，鴻海對班大學畢業生開出逾三萬元新台幣（約七千八百港元）嘅「高薪」，都搵唔到人做。
郭台銘表示喺台灣搵人難，即使調升薪酬請大學生都唔易。
今年三月，鴻海喺台灣啟動聘請萬五人嘅徵才計劃，郭總話，集團最低薪金已經調高到二萬六千五百新台幣，請大學生更加開到三萬幾，但都係搵唔到人。信奉關公出晒名嘅郭總，啱啱先親自捧咗一尊重達四十七公斤嘅關公像返鴻海總部安放，佢仲叫班年輕人「要有信心」，「要多學習關公忠義嘅精神」。唔通佢想台灣嘅後生仔學關二哥咁，捱吓義氣？
其實，台灣科技業揮別近三年嘅寒冬，今年景氣明顯回暖，除咗鴻海，台積電、日月光、聯發科等大公司一樣都求才若渴，據聞，有公司最基層嘅工人起薪加獎金，月薪可以有五萬蚊新台幣以上，但係公司仍然面臨嚴重缺工嘅問題。
