城中鏡：顧紀筠打住牌等開波
全城熱追世界盃賽事，近年瞓身商界發展嘅顧紀筠也一樣，以前經常係球賽第一線嘅佢，依家就會同班好友一齊去朋友家中睇世界盃賽事，既敍舊、又睇波，但今年賽事經常喺深宵，好多人都變咗熊貓族，佢哋又點呢？顧紀筠話：「因為唔係個個人都對睇波咁有興趣，所以佢哋開枱打麻雀。」又係喎，打住麻雀等開賽，時間都易過啲。
顧紀筠都熱追世界盃，仲睇好荷蘭同巴西添。
不過，顧紀筠就話打牌唔叻，咁係咪全神貫注睇球賽？又唔係喎，因為朋友會飲吓酒，試過醉咗連賽事都睇唔到。嚟緊嘅賽事，佢已經約定朋友，大家一起感受吓氣氛。講到心水，佢話自己支持荷蘭及巴西隊。世盃賽事結束，暑假又到了，佢已經計劃同老公去旅行：「我哋會去倫敦，再坐船去西班牙，喺海上面relax，前後十日左右。」
