城中鏡：名人新抱撐母乳餵哺
家有一B，人人鍾愛。外號「快勞夾大王」嘅小母牛香港籌款委員會主席杜振源（Simon）日前為孫女Lucille搞百日宴，多位政商界名人及好友齊齊捧場。早前有媽媽喺車上餵哺母乳時被偷拍兼放上網，事件喚起社會關注，宴會上，三位生完寶寶冇耐嘅媽媽都分享一下。佢哋話本港只有部分新商場設有餵哺母乳專用地方，有時出街都搵唔到地方餵母乳，只能用餵哺圍巾遮住，否則惟有唔出街，所以望多啲辦公室及公共場所設置哺乳室。
鄧振豪與太太Giselle（左二及一）、杜擴業與太太Vivian（後中及前中）、葉瀚林及太太Connie（右二及一）齊齊抱住小朋友合照。
葉澍堃（左起）、杜振源及鄧慶治有孫萬事足。
杜振源孫女搞百日宴，笑到見牙唔見眼。
Simon孫女嘅百日宴有好多嘉賓，包括同屬小母牛嘅前財政司司長梁錦松同太太伏明霞、前高官葉澍堃（Stephen）及佳能高級副總裁鄧慶治（Mingo），其中Stephen同Mingo仲帶埋囝囝、新抱同乖孫一齊出席，三代同堂。問Simon有冇過幾招湊女秘笈畀囝囝杜擴業同新抱Vivian，佢就話依家年輕人好叻唔使擔心。
盼增加哺乳室
至於Stephen嘅大仔瀚林同太太Connie、Mingo兒子鄧振豪與太太Giselle，就同Vivian非常啱傾，原來佢哋三人都有餵哺母乳。佢哋異口同聲話，香港餵母乳嘅設施唔足夠，通常新商場先有，而使用洗手間餵母乳就好唔衞生。Connie話，如果能夠有多啲餵哺母乳嘅地方就好喇，好似佢公司就設有一個拍卡才能進入嘅哺乳室，非常細心，環境始終較洗手間乾淨好多。
即使喺戶外，Connie都有計，呢日見佢用一條類似圍裙嘅「餵哺圍巾」，圍住BB喺餐廳餵母乳，佢就話外國好興，因為圍住之後自己望到BB，但人哋就咩都睇唔到，夠晒私隱。
