SUN搞作：打橫嚟講：隔籬屋三姑的疑惑

三姑問：「點解會有七十幾萬人去投票嘅？」我答：「因香港人想要有真普選囉！」

三姑又問：「乜有假普選o架咩？」

升降機到。二人入升降機。

三姑再問：「聽啲高官講，今次呢個全民公投係唔合法個喎！」我答：「唔合法，不等於違法同犯法！偏偏仲係個合情合理嘅民意表達！」

三姑說：「乜呢個投票唔係呼籲啲人支持佔中嘅咩？」我話：「唔係！呢劑嘢啱啱相反，愈多人出嚟投票，佔中的機會就愈低！」

三姑晒頭：「你講啲嘢乜咁神化嘅？」我回應：「哦！啲人投票後，會有結果公布嘅！若香港政府聽取民意嘅話，根據投票結果去制訂政策，紓解民怨，咁咪唔會有人佔中囉！」

三姑笑曰：「呵，我明啦！即係愈多人參與投票，個結果認受性愈高！」嘩吓！三姑雖然係個三姑，但佢唔係傻個喎！

三姑突然變臉，問：「喂！聽講有人話個投票方法好流，有啲人亂咁出術都投到票喎！就算畀佢過百萬選票，有幾多真幾多假，鬼知呀！」我淡淡定答：「係呀！好事總有人搞破壞同抹黑嘅！所以，咪有人呼籲，有份用手投咗票嘅人，喺七一用埋腳行出嚟，上街點人頭囉！」

三姑陰陰笑：「呢劑買定花生，好睇過C朗拿度啦！」

叮一聲，到咗碇、升降機門打開，我先行出，背後聽到三姑自言自語：「做乜鬼個廢柴政府唔敢畀市民一人一票選特首嘅呢？」

我回頭時，見三姑向大廈個實Q重述緊升降機裏頭我倆的對話……

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府