新公屋保安漏洞多，危害市民安全，房屋署又唔肯改善，李衞就問吓官員有乜解釋！

李衞：新公屋保安設計咁多漏洞，點解唔肯改善先？

官員：所有設計都冇問題。

李衞：冇問題？大廈後門冇裝閉路電視喎……

官員：咁咪用大堂嘅閉路電視監察囉，好簡單。

李衞：但有啲閉路電視屏幕放喺保安員工作枱後側，保安要轉身先睇到，幾麻煩！

官員：都冇問題吖，一樣喺保安視線範圍之內。

李衞：仲有呀，大廈地下閘門有罅隙，陌生人隨便就可以開門掣進出大廈啦，你話死未？

官員：就算真係入到，保安應該察覺到，阻止佢哋上樓。

李衞：你依家咁講，全部都要保安員幫你執手尾啦！

官員：唔係，只係想話，呢啲唔係設計嘅漏洞，如果有事發生，係屬於人為嘅漏洞。

李衞：有你咁嘅官，就真係人為漏洞喇！

官員：#@^$&%^$%#@

第一手消息請下載on.cc東網iPhone/iPad/Android/Windows Phone Apps