政壇：搞搞政：七一鬥撲水泛民鬼打鬼
七一遊行變成泛民政黨政團嘅「抽水」盛事，競相從此籌措來年經費，好似當遊行市民係「提款機」咁。「佔領中環」（佔中）呢一兩年亦加入撳錢行列，皆因佢哋過去搞民調同公投都使咗三百幾萬元，七一前仲使凸欠債四五十萬元，講到明要靠七一遊行籌款填氹。正所謂，多隻香爐多隻鬼，佔中搶錢，其他泛民黨派籌款肯定更受影響，唔知公文袋等政黨點樣迎戰呢？
設計圖片及對白
佔中搞手之一陳健民透露，今次公投畀咗港大民意研究計劃二百幾萬元，又用咗幾十萬元做文宣、橫額等，計計埋埋差不多使晒之前籌嘅錢，加上佢哋要出糧畀職員，估計七一前已經要孭債。佢哋打算喺灣仔港鐵站附近擺一個街站，賣新版T恤同袋，加上佔中三子站台，聯同近百名義工，希望可以籌到一百多萬元填氹。雖然陳健民話佔中只係擺一個街站，唔想同其他民間團體「爭生意」，但近年泛民陣營大把團體爭搶錢，預料其他政黨政團籌款將大受影響。
主辦七一遊行嘅民陣就話，已同四十幾個民間團體協調，按傳統每個團體都會向民陣上繳一成籌款額。不過，以往有唔少團體因為不滿上繳而「走數」，所以民陣打唔打得響呢個如意算盤，似乎唔多樂觀。
