政壇：李鋈麟無意搶「遊行客」

七一將至，去年搞購物節被人話有意搶「遊行客」嘅全港各區工商聯會長李鋈麟（Alan），今年再搞平貨大酬賓，仲招徠了二千間商戶響應，數目足足比去年多四倍。今年加碼推優惠，Alan話只想益街坊，無意淡化遊行氣氛，買完嘢後一樣可以去遊行喎。

李鋈麟今年七一續搞購物節，直言買完嘢後都可以去遊行。

Alan話：「（大家）想去遊行又得，購物又得，兩件事無任何關連。」佢話，接連喺七一送大禮，係因為唔少商戶賺到錢，要求繼續搞，於是分別喺去年十二月及今年三月多搞兩次購物活動。今年未到七一，已早喺六月初再次推出大酬賓，為期一個月至七月底。若然反應好，八月會再搞多一次都未定。

近排零售市道氣氛急轉直下，Alan都話身受其害，佢嘅皮草生意亦較去年下跌三、四成。不過，佢好有阿Q精神，直言唔少鐘錶店老闆比佢更慘，生意大跌五成。所以今次大搞購物節，無非想帶動消費氣氛，等人人有工開喎。