政壇：創科局謀下月先獲放權
立法會郁吓就玩「拉布」，政府唔少建議都被拖住晒，好似「創新及科技局」咁，因為立法會財務委員會受到新界東北撥款拖累而大塞車，搞到緊隨其後嘅撥款全部望天打卦，創科局都唔知要等幾耐先獲批撥款。但喺呢個不明朗時期，政府就諗住勇闖立法會，決定下月二號提出決議案，將部分商務及經濟發展局局長蘇錦樑嘅權力，轉移至未知幾時開得成嘅創科局局長手中。
創新及科技局開局問題令蘇錦樑相當煩惱。（資料圖片）
問題就出現喇，如果財委會一日未批錢，就算決議案獲通過，創科局局長擁有權力，都係冇意思，一定要權力、資源雙雙到位，成個局先可以正常運作。今個會期剩低嘅日子唔多，分分鐘隨時爛尾收場，要待下個立法會期先可以通過，政府打算喺呢個時候提出決議案，唔通佢睇準財委會主席吳亮星好快完成「剪布」？
其實政府只係唔想再浪費光陰，萬一財委會通過創科局撥款後，先向立法會提交決議案轉移局長權力，咁唔止浪費時間，到時分分鐘燃起第二個火頭，屆時創科局要成立就真係難上加難。
