政壇：「兩舊雲」噴口水鬥悲情
泛民激進派揚言喺立法會全線「拉布」，結果令尋日嘅工務小組委員會又受影響，佢哋尋日討論涉及二億二千多萬元嘅中部水域人工島策略性研究項目，泛民議員輪流多次發言，又先後就項目提出終止待續及休會動議，四小時會議得個拗字，亦未能就項目表決。建制派議員蔣麗芸（Ann）仲同泛民議員黃碧雲（一舊雲）鬥噴口水、鬥演悲情，直到會議完結搭（升降機）走都仲拗唔停。
設計圖片
阿Ann會上話，九龍西係劏房重災區，佢經常都去視察劏房戶︰「有次試過行入去，我『嘩』一聲喊咗出嚟，真係要發展房屋。」佢話，人工島呢個項目發展事務委員會已傾過，希望唔好再「拉布」咁話。不過，「一舊雲」就冇為阿Ann嘅眼淚動容，因為佢心繫中華白海豚，「一舊雲」話，政府將陸續有好多填海工程，「海洋係抵受唔到粗暴蹂躪，海豚係唔識呼喊、唔識嗌救命o架，但啲屍體就會浮晒上嚟。」佢仲反駁阿Ann，話就算起人工島，又話要搞咩東大嶼都會，到時都未必係用嚟安置劏房戶喎。
狂拉布建制眼火爆
泛民議員搏命「拉布」，搞到建制派議員眼火爆，其中保險界陳健波就批評泛民提出嘅問題根本係無的放矢，佢仲好勞氣咁話︰「我入議會希望為香港發展畀建議，依家更大嘅職責係阻止破壞，令議會向前行！」佢又督促工務小組主席盧偉國「容忍要有限度」。
議員王國興亦斥責泛民，話泛民經常批評政府公屋不足，但政府陸上搵地，佢哋又反對新界東北發展計劃，依家政府海上覓地，亦都畀佢哋反對，正一「左又唔得、右又唔得、上又唔得、下又唔得」、「損失嘅係大眾，但議員就照出糧」，佢仲叫泛民「畀民生一條路行吓」咁話。
