侈談妥協藝術 財爺自暴其醜
古人教落︰為政不在多言，顧力行何如耳。通俗啲講，即係叫班高官咪成日噴口水，落手落腳做實事好過喇。可惜吖，港產官僚反其道而行，一個二個隨口噏當秘笈，特別係財政司司長曾俊華，正經嘢唔見佢咁叻，最鍾意不務正業寫吓網誌文章。呢，佢前日又有新作喇。
姑且聽吓佢講乜。佢話喎，由於議員以唔同形式拉布，唔單止新界東北發展計劃前期撥款喺立法會財委會觸礁，仲搞到其他民生撥款「大塞車」。佢質疑七百萬市民可以有七百萬種意見，係咪一有唔同意見就要押後甚至推倒重來呢？所以新界東北發展又好，三堆一爐甚至政改都好，冇可能皆大歡喜，關鍵係大家作出取捨同妥協咁話。佢又拾美國前國務卿希拉妮牙慧，話「艱難的抉擇」係各地從政者須面對嘅問題喎。
好在鬍鬚曾唔係專欄作家，否則佢嚟嚟去去三幅被，實聽炒魷都得嘞。係人都知拉布影響施政同民生，佢自己喺網誌都寫過好多次，佢唔悶市民都悶。再講吖，激進政客拉布目的正正係癱瘓政府施政，向佢哋曉以大義，希望佢哋自動自覺金盆洗手，無異與虎謀皮，慳番啖氣啦。
至於凡事講求取捨同妥協咯喎，鬼唔知阿媽係女人咩。只有喺獨裁國家，民眾至唔敢有唔同意見，香港出咗名係多元社會，意見紛紜甚至七嘴八舌，正常不過。問題係，呢個政府弱過藥材舖，政策推出後一遇爭議，唔係一拖再拖，就係舉手投降，話就話「成熟一項，推出一項」，實際上係「推出一項，跪低一項」，邊次試過擺平到各方爭議凝聚共識吖。就講發展新界東北吖，大部分民意其實支持計劃，好多等住上樓嘅無殼蝸牛都希望政府做番場好戲，而真正激烈抗爭嘅其實只係少數人，結果咪一樣寸步難行。鬍鬚曾仲好意思大談「妥協嘅藝術」，簡直係崩口人忌崩口碗。
最好笑嘅係，有啲人崇洋媚外，開口埋口都引外國例子顯示自己知識淵博，殊不知弄巧反拙，自暴其醜。即係咁，要舉例其實唔使扯到美國咁遠，同港英政府比就得啦。想當年沙田、將軍澳同屯門等新市鎮，咪一樣係從農地或者荒地發展起嚟，點解港英政府做得到，特區政府硬係做唔到？邊個強政勵治，邊個碌碌無為，唔使多講嘞啩？
不過講番轉頭，鬍鬚曾講嘅又唔係完全冇道理嘅。佢話喎，如果有完美嘅選項，冇人會選擇唔完美嘅「次貨」。咁又係嘅，如果有得揀，市民又點會揀個「宅男」做財爺呢？叮！
