城中鏡：今年「鼠戰中環」增難度
全城矚目嘅慈善盛事「鼠戰中環」定咗喺十月十九日舉行，係連續第九年搞嘞，置地公司行政總裁彭耀佳預告今年會增加難度，令賽事更加有趣刺激，深信今年嘅「鼠戰中環」將會係歷嚟最精彩、最盛大嘅賽事。
新一屆鼠戰中環將喺十月十九日舉行。
呢項節奏緊湊嘅接力賽以職場生涯為主題，由八人組成嘅參賽隊伍當公事包做接力棒，沿途克服重重障礙，象徵响企業青雲路上面對嘅不同挑戰。參賽健兒响比賽過程中鬥智鬥力，為睇比賽人士帶嚟精彩賽事之餘，仲乘機推廣平衡生活同工作嘅重要性。
今年賽事難度增加，加咗新障礙，考驗參賽者嘅體能同智力。例如喺賽段三「渾身解『數』 獨具慧眼」中，參賽者必須搵到正確數字，完成一項「數獨」遊戲。對上班族嚟講，團隊精神同人脈關係好重要，所以賽段四「沉著應對 畫出理想」嘅參賽者要同隊友合作，用一支巨型畫筆完成畫作。喺賽段六「深入險地 發掘潛能」，隊員又必須拚盡全力通過一條隧道。
