設計圖片及對白
高調為浸會大學爭取九龍塘李惠利用地嘅浸大校長陳新滋，尋日突然宣布明年六月底約滿後就退休，換言之塊地都未到手，做咗一任校長就同浸大講再見，令人懷疑佢係以約滿退休代替搶地失敗辭職嘅承諾。但據聞佢私底下堅稱今次決定同李惠利幅地無關，佢喺畀師生校友嘅電郵中進一步話呢個決定並唔容易，自己明年就六十五歲，聽家人話選擇退休，加上浸大發展已上晒軌道，可安心引退重拾佢醉心嘅科學研究喎。
強調與李惠利用地無關
回想當日，陳新滋就李惠利用地擬改做住宅用途同政府隔空開火，仲揚言如果浸大爭唔到塊地就會辭職，經過一輪抗爭後，城規會最終決定唔改土地用途，將個波拋返畀教育局話事，教育局就講明塊地可以用嚟做特殊教育，死都唔肯畀浸大。
如今浸大要攞到塊地可以話難過登天，起中醫教學醫院嘅計劃隨時胎死腹中，雖然陳新滋私底下同班同事講今次決定同李惠利無關，但連浸大學生會會長陳天俊都疑似唔信，仲話兩者好難話唔關事，又爆料之前收到風話陳新滋唔做，所以對陳約滿退休都唔係太意外。
浸大校董會主席鄭恩基對陳新滋離任感可惜，但表明會尊重佢嘅個人意願，校董會決定成立一個聘任委員會全球招聘新校長，又會邀請學生會代表同校友會代表會面，定期公布招聘進展。
第一手消息請下載on.cc東網
