幾名網民尋日帶晒薯片汽水，「聲援」揚言要絕食到死嘅李偲嫣。（互聯網圖片）
「正義聯盟」召集人李偲嫣，前日開始喺政府總部對出進行無限期絕食，抗議針對新界東北撥款嘅暴力衝擊行為同政府嘅軟弱回應。估唔到佢一個人絕食，比起早前有十幾人參與嘅泛民普選絕食團回響仲大，尋日絕食行動展開未夠二十四小時，已有一批網民去咗「探望」同「聲援」佢。呢班十幾歲嘅網民仲好有「禮」，冇話兩手空空咁探人，帶晒薯片、汽水去「野餐」，仲送咗支忌廉汽水畀李偲嫣，期間一度驚動警方，唔知攞景定贈興。
李偲嫣就話絕食一日後覺得有啲攰、腰酸骨痛，又呻政總出面好多蚊，瞓覺時覺得個地下好硬，反應都慢咗。不過佢尋日就成功爭取到日本電視台NHK，專程派員嚟訪問佢絕食嘅心路歷程。對於班網民搞野餐嚟玩佢，佢就揚言最多絕食到死，但「我唔會畀人激得死！」有網民又翻佢舊帳，話佢喺兩年前公開鬧過班反國教示威者搞絕食，強調「此風不可長」，佢解釋話，當時佢係不滿班反國教人士煽動啲學生哥絕食，同佢作為一個成年人自發絕食唔同喎！
第一手消息請下載on.cc東網
