楊立門自言識唱歌同即時傳譯，但唔識得幫人助選。（資料圖片）
估計大家都聽過「有人嘅地方就有是非」呢句說話，官場更加係是非集中地。宣布提早退休嘅「AO歌王」民政事務局常任秘書長楊立門，尋日趁退休前同傳媒茶敍，盡訴心中情。對官場盛傳佢同政務司司長林鄭月娥唔啱牙？楊立門話呢個只係誤會，但就認當年喺發展局共事試過激烈咁嘈過一、兩次交，但係佢形容兩個人只係對工作上嘅問題有唔同意見，唔算係不和喎！
不過，當講到佢現任老細民政事務局局長曾德成時，佢就大讚人哋信任下屬，識得「抓大放小」，佢同曾德成相處得好好，相反林鄭嘅處事作風就係「大細都抓」，即係咩都攬上身。咁都唔叫不和？楊立門真係厚道囉。
早前政界有傳楊立門提早退休，係為咗幫前財爺梁錦松備選特首，楊立門強調唔識助選，亦完全無咁諗過，相反佢想喺退休後認真發展歌唱興趣，例如幫人唱歌籌款，甚至考慮將唱歌發展成第二事業。除咗唱歌好聽，原來佢仲識即時傳譯，退休後會申請政府臨時工做即時傳譯員，將來喺立法會開會嘅高官同議員，隨時會响耳筒聽番楊立門把聲喎。
第一手消息請下載on.cc東網
