政壇：「橄欖」驚拉布邏輯亂龍

尋日交通事務委員會傾港鐵票價問題，人民力量「大舊」陳偉業同新民主同盟范國威先後提出反對港鐵加價同埋其他幾項動議，本來簡單處理就得，點知交委會主席「橄欖」陳鑑林認定佢哋係拉布，竟然話委員會之前已經通過咗擴展票價優惠嘅動議，即係同意加價啦，所以唔處理反對加價嘅動議。咁特別嘅邏輯都講得出，做主席真係唔容易。

港鐵加價人人喊打，偏偏橄欖挺身而出做箭靶，大舊當場鬧佢強姦民意，范國威就好激動咁話陳鑑林企圖誤導公眾。橄欖見群情洶湧，最後都屈服處理加價動議，但仍死撐「我讓步唔緊要，反正呢個都係無任何法律約束力嘅動議，好唔好！」仲話議員唔應該臨時不斷提交動議，咁樣做係無意義，只會搞亂會議程序。

范國威聽完仲嬲，鬧橄欖矮化自己嘅主席身份唔緊要，但唔好阻佢做嘢。之後兩個人再為有無讀出動議內容拗到面紅耳熱，仲愈鬧愈大聲。橄欖最後質問范國威「你以為拉布嘥大家時間有好處咩？」警告佢唔好再嘈落去，否則就即刻請佢離開，呢場鬧劇先至完場。