有議員助理用立會大樓內嘅電腦登入立會網頁，自動彈咗去一個台灣網頁。（受訪者提供）
話說「佔中」全民投票早排「預演」嗰陣，聲稱網站受到「史無前例」嘅大規模黑客攻擊，但到咗真係投票嗰時，啲黑客反而好似冇晒影，認真神怪，有人質疑呢場攻擊係佔中自編自導自演嘅苦肉計，目的係吸引多啲人投票。咁啱得咁蹺，立法會嘅官網，尋日朝早都有段時間出咗問題，登入後自動彈咗去一個台灣網頁，最啱嘅係呢個網頁個名有「人力」兩隻字，但就同香港嘅激進泛民政團人民力量無關。
新同盟議員范國威話，尋日上晝十點幾，當佢嘅助理準備喺立法會大樓辦公室內嘅電腦，打開立法會網頁做嘢時，發現有幾部電腦都自動彈咗去一個叫「1111人力銀行」嘅台灣搵工網頁，佢立即同立法會秘書長陳維安報告。秘書處證實收到議員查詢，資訊科技組會密切監察，但暫時未講到出咗乜問題。
第一手消息請下載on.cc東網
