政壇：吳得掂翻兜舊臣搞幼教
被嘲為「吳得掂」嘅教育局局長吳克儉，雖然「掛名」孭起十五年免費教育，但統領幼稚園教育多年嘅教育局前副秘書長葉曾翠卿退休後一個月，就發現自己唔得掂喇！千算萬算，吳得掂決定極速「翻兜」葉太，畀葉太義務加入「免費幼稚園教育委員會」，仲專登為佢開咗個副主席職位，任期即時生效，直至委員會完成工作為止。睇嚟吳得掂咁急，佢無咗葉太似乎真係唔得掂喎！
吳得掂話葉太喺委員會的工作完成前離任，將對委員會往後的工作構成影響。（資料圖片）
已退休的葉曾翠卿獲邀出任「免費幼稚園教育委員會」副主席，即時生效。（資料圖片）
吳得掂成日話十五年免費教育要「急事急辦」，但無咗喺政府教育部門打滾三十五年、對幼稚園政策非常熟嘅葉太做主帥，吳得掂就只會顯得仲唔掂。教育局尋日宣布委任葉曾翠卿以個人身份做「免費幼稚園教育委員會」副主席。吳得掂讚葉太榮休前，主打幼稚園教育政策，又積極參與喺舊年四月成立嘅免費幼稚園教育委員會工作，但又好似埋怨葉太咁話：「佢喺委員會嘅工作完成前離任，將對委員會往後嘅工作構成影響。」免費幼稚園教育委員會主席鄭慕智就話，有信心出年向政府提交可行性建議。
