政壇：箍票不力 陸恭蕙甩轆

要再作修改闖關

施政報告早前預留咗十億設立資助計劃，資助七個已修復堆填區發展康樂設施或其他創新計劃，如撥款畀非牟利機構作基本工程等相關費用，Christine率領環保署多名官員出席環境事務委員會，尋求委員會支持提交財委會審議。

不過，多名泛民議員都質疑計劃只限喺修復堆填區發展康樂設施，其中白鴿黨胡志偉擔心，計劃會否成為民政事務總署「伙伴倡自強社區協作計劃」嘅翻版，即係大部分都蝕本離場。人民力量陳偉業就乘機同當局投訴，話鄰近屯門堆填區嘅下白泥，最近蒼蠅多到嚇親人，要求當局正視堆填區附近嘅環境同衞生問題。

Christine同環保署多名官員會上盡力解答議員提問，可惜會上只得三人支持，五人反對，所以委員會唔建議將呢個資助計劃拎去財委會，換言之當局要稍作修改再向委員會「闖關」。竟然咁樣都甩轆，認真醜怪！

泛民議員范國威之後再提出兩個無約束力動議，其中一個係要求當局考慮將粉嶺三個高球場嘅其中一個收番。唔似早前建制派勢孤力弱，今次有八人坐定定反對，泛民加埋范國威只得四人，有關動議被否決，成功避免再畀泛民突襲。

究竟係親自坐鎮嘅Christine箍票不力吖，定係建制派議員明知財委會議程「大塞車」所以放軟晒手腳？呢個留待大家自行判斷嘞！