消防處最叻擦鞋 退休騷全城鬧爆

嗱嗱嗱，消防處九唔搭八又獻世喇，處方近排按照「慣例」，為任內瘀嘢多到痹嘅處長陳楚鑫搞退休騷，將消防處擦鞋文化發揚光大，卒之咪搞到天怒人怨，全城鬧爆囉。

梗係喇，為「歡送」處長退休，出動近百名消防員，連續幾日每日八粒鐘綵排不特止，仲安排消防新車做布景板，改以老爺消防車出動救人；為騰出空間做騷，罔顧市民安危，將生化救災貨櫃搬走。同樣離譜嘅係，為咗攞威，要消防員為擦鞋騷做「知客」、「阿四」兼泊車仔，公然違反安全條例要消防學員冒雨步操同模擬救火表演。

大龍鳳搞到咁誇張，如果係「私人火燭館」，話之你做成個禮拜「六國大封相」都冇人會理，但消防處係阿公嘅，公帑一定要用得其所，處方分明係倒納稅人米啫。正如有監察政府組織負責人批評，消防處每逢處長退休都做大龍鳳，凸顯官僚擦鞋文化嚴重，擔心出現骨牌效應，擦鞋歪風喺政府部門蔓延。

話時話，陳楚鑫上任兩年，毫無建樹不特止，仲屢爆醜聞，任內消防處多次被批管治不力，除咗被揭發集體秘撈，打壓新聞自由，更被審計署踢爆管理不善，弄虛作假。呢個無德無能，將消防處搞到七國咁亂嘅庸官，居然仲好意思接受咁嘅禮遇，佢知唔知醜字點寫o架？

公道自在人心，「東方報業民意調查」結果顯示，對於消防處大搞處長退休騷，近五成受訪者認為係勞民傷財，浪費人力物力；兩成五人指消防處擦鞋文化嚴重。

擦鞋文化係消防處嘅「專利」，其他紀律部隊包括警隊、入境處、海關同懲教署等從來唔興呢一套，唯獨「歡送大龍鳳」呢類擦鞋騷一直喺消防處「薪火相傳」，而且愈搞愈誇張。上述調查顯示，對於消防處每逢處長退休都大搞歡送騷，前線被迫出席，四成三受訪者認為係高層擦鞋，基層受罪；兩成四人直指呢種做法係不務正業。對於陳楚鑫上任唔夠兩年就提早退休，四成一受訪者認為係庸官無能；兩成七人認為佢管理無方。

市民眼睛係雪亮嘅，消防處近年醜聞不斷，鑊鑊新鮮鑊鑊甘，都係多得呢個不務正業嘅處長啫。計太一叮話齋，咁嘅庸官早走早着，家陣執包袱滾蛋，好行夾唔送咯，叮！