呢個消防之恥錯鑫，在位時已經搞到下屬怨聲載道媽媽聲，好啦，終於等到佢退休，點知臨走仲要糟質班細嘅，做泊車仔不特止，又要玩爆炸火災表演，直頭收買人命，我李衞一定要幫消防員討個公道！

李衞：你走就走啦，搞乜退休騷呀？簡直勞民傷財！

錯鑫：咁就啱嘞！我知自己唔可以名留青史，惟有選擇遺臭萬年，等香港人記住我！

李衞：你呢個衰神，班細嘅救火救人已經好辛苦，仲要佢哋玩爆炸表演？你當馬戲班呀？搞出事點算？

錯鑫：咩呀！我為佢哋好咋！好似我咁，咁多年都係做小丑啫，咪幾成功！

李衞：可怒也！咁叫班細嘅做泊車仔，都係為佢哋好啦？

錯鑫：啱晒！你知消防員幾鍾意秘撈o架啦！等佢哋學做泊車仔，出到去搵part time都易啲！

錯鑫：（遠方傳來巨響）

李衞：呵呵，班細嘅手車麻麻地喎，睇嚟你架車要大修喇喎！

錯鑫：嘩……呢次渣都冇喇！

第一手消息請下載on.cc東網iPhone/iPad/Android/Windows Phone Apps