政壇：佔中義工備攝錄機防搞事
近年逢有大型集會爆發衝突，由於火頭眾多，好多時傳媒只能事後睇片先知真相。或者連佔中秘書處都知道「有片有真相」，尋日六二二公投，就有唔少佔中糾察喺膊頭位置架設微型攝錄機。佔中秘書處話原來幾個月前已開始有呢個構思，因為群體活動始終唔知會有咩事發生，萬一有人喺佔中期間搞事，故意挑起衝突，咁義工都可以第一時間影到真相，就算需要上法庭作供，佔中都有多啲證據保障自己。
佔中糾察設置隨身攝錄機，即時拍低現場人士一舉一動。
保證唔會放上網
佔中秘書處話，呢啲鏡頭全部係義工自備，平至幾百蚊，貴嘅二千蚊都有，至於啲片會保存幾耐，秘書處就話所有錄像會按照《私隱條例》處理，適時會刪除片段。佢哋保證所有片段都唔會擺上網，希望大家放心。呢個做法都好事嚟嘅，起碼有片在手，爆發衝突時都唔使口同鼻拗啦。
