近年政府接連推動多個較為難明深奧嘅大政策，其中一招係用漫畫「軟銷」，勞工及福利局局長張建宗尋日喺網誌透露，政府推出咗一套漫畫講解標準工時，據講呢套漫畫係標準工時委員會諗出嚟嘅建議。漫畫中有一個叫阿勤嘅員工同老闆對話，然後漫畫主角「工時小博士」就從旁解釋世界各國標準工時嘅例子。

標準工時委員會推出漫畫講解標準工時。

舉例指韓國規定公司規模少過四個人就可以豁免標準工時，美國公司如果生意額太低，又可以獲豁免，部分特別行業如海員、漁民等也多數納入豁免範圍。講完外國例子就到香港，「工時小博士」話香港係咪實施標準工時，都要考慮唔同因素，包括商界承受能力，同埋會否令工作「零碎化」等。

今次呢套漫畫雖然圖文並茂，但仍然係字多過圖，或會影響市民一次過睇晒嘅興趣，唔知第時隨着標準工時討論愈來愈深入，當局會否學其他政策局推出「常人包」，再引導社會理性討論政策嘅關鍵內容呢？

第一手消息請下載on.cc東網iPhone/iPad/Android/Windows Phone Apps