政壇：阿Ann撐老公幫立會調解
立法會議員Ann蔣麗芸一向出名中氣十足，不時放聲大鬧泛民主派議員。之不過，立法會主席曾鈺成早前就喺會議期間，「建議」阿Ann少啲講無用嘅說話，呢句建議實際咪就係叫阿Ann講少啲廢話囉。而阿Ann尋日喺佢社交網站專頁發表咗個新近況，話佢老公梁海明一直致力推動調解服務，仲出過多本有關調解同仲裁嘅教科書，所以早前就打趣咁問老公幾時去立法會做調解喎。
蔣麗芸（左）打趣咁問老公梁海明（右）幾時去立法會做調解。（資料圖片）
眾所周知，調解員要由第三者做先有機會達至雙贏，阿Ann成日咁鬧班泛民，就算佢老公肯做調解員，泛民議員都未必願意同佢傾啦，唔知阿Ann係咪忘記咗曾鈺成嘅建議呢？講番阿Ann嘅留言，佢仲話，老公聽到佢咁講就笑言，聯合國屬下亦為處理各國紛爭而設調解小組，所以可能立法會係時候考慮整番個由第三方組成嘅調解小組喎。
