政壇：長毛寫詩讀書頂波癮
相信大家都留意到，好多著名詩人、作家或者作曲填詞家，都係喺失戀、失意甚至坐緊監期間，撰寫出最經典、最感人嘅作品。因衝擊遞補機制論壇，而要喺牢獄中度過「六二二」同七一等「大日子」嘅社民連議員「長毛」梁國雄，入獄後詩興大發，繼上周作咗首「藏頭詩」諷刺財務委員會主席「星爺」吳亮星後，尋日佢又有新作面世。一向鍾意踢波同睇波嘅長毛，喺獄中亦冇得睇世界盃，據聞佢除咗寫詩，主要靠友人送贈嘅六本詩集同史哲書度日嚟頂波癮。
設計對白及圖片
早已預言出線形勢
依家喺荔枝角收押所服刑嘅長毛，因為冇得再喺財委會就新界東北撥款拉布，早前就喺獄中寫咗首「藏頭詩」畀星爺，全文係「亮相逞兇剪義布、星夜闖關阻專權、仆前繼後護東北、街頭巷尾撐公投」。乜嘢叫做「藏頭詩」？就係串埋每句詩嘅第一個字就別有意思。
至於長毛首新詩為「六月酷暑牢房熱，長毛心焦恨無翼，公投思慮難斬斷，但願眾心志更堅」。至於佢睇緊嗰六本書，就包括汪精衛詩集《不負少年頭》、托諾斯基嘅《先知三部曲》，同埋已故南非前總統曼德拉嘅自傳等，唔怪得之佢寫啲詩愈嚟愈悲情傷感啦。
長毛喺入獄前預測過，話主辦今屆世界盃嘅巴西天氣濕熱，歐洲球隊冇可能奪冠，又話大熱門巴西都有隱憂。結果多支歐洲傳統勁旅，包括好多港人支持嘅英格蘭同上屆冠軍西班牙等，均先後提早出局，連意大利亦危危乎，巴西都只係表現平平，證明長毛獨具慧眼。可惜獄中亦冇得落注賭波，否則長毛一早發咗。
