空管殃及池魚 機場七國咁亂

係咁嘅，上海尋日失驚無神實施航空管制，搞到本港數十班航機受影響，其中部分航班需要延誤甚至取消，旅客怨聲載道，七國咁亂。有內地旅客反映，航班原定前晚九點飛上海，點知拖到第二日凌晨仍然毫無動靜。航空公司向旅客提出賠償建議，希望佢哋落機接受新航班安排，但部分內地旅客唔肯接受而拒絕離開，於是就出現「佔領機艙」呢一幕嘞。直到尋日中午，航空公司答應加大賠償額同盡快安排佢哋飛上海，事件擾攘十幾小時後至告一段落。

正所謂，公說公有理，婆說婆有理。旅客屈喺狹小嘅機艙十幾粒鐘，冇啖好食，冇覺好瞓，唔怨氣沖天就假咯。之但係咁，內地突然實施空管，航空公司失晒預算，某程度上都係受害者，旅客有理冇理入晒佢哋數，似乎唔多公道喎。

正所謂，冤有頭，債有主。家陣問題出喺內地，旅客要追究責任，應該搵內地當局至係o架，死咬住香港嘅航空公司唔放，唔單止強人所難，仲會畀人覺得欺善怕惡添。

講開又講，雖然中國已經成為全球最大旅遊國，旅客出手疏爽，被各地奉為「財神」，但旅客不文明行為五花八門，無奇不有，早就臭名遠揚。埃及聖殿刻字、羅浮宮水池洗腳、華爾街騎上牛背……搞到唔少地方專門以簡體字告示提醒中國旅客遵守秩序，認真羞家。所以話啫，同胞出門旅行，都係注意吓形象好啲，否則，盞丟架嘅咋。

當然啦，歸根究柢，今次之所以搞到航班大混亂，都係因為內地部門管理混亂。內地三日唔埋兩日就空管，令人無所適從。淨係舊年咋，香港民航處就收到內地超過四百次空管通知，超過一千四百班航班受影響。今年二月之嘛，成都同上海兩大主要航空要塞齊齊空管，搞到港澳「大塞機」，區內近七十班航班延誤，都咪話唔得人驚。

內地空管之所以立立亂，有人分析係因為空域流量管制由空軍負責，民航機可以使用嘅空域有限，實情係咪咁就唔知嘞，但可以肯定嘅係，城門失火，殃及池魚，香港次次都被拖累，搞到航班甩拖多過食飯，大大打擊旅業形象，真係多得佢唔少。唔使太一叮多講啦，唔該港府同內地部門加強溝通同協調，唔好一味等運到喇，叮！