SUN焦點：工廈劏售迷你倉 買家隨時一身蟻
寸金尺土，迷你倉成為港人擺放雜物好地方，需求大增下，近月有商人將工廈劏成迷你倉再打散出售，面積數十平方呎的獨立迷你倉開價三十二萬元，並推出「迷你倉託管計劃」，保證首兩年倉主有租金收入。雖然賣家聲稱每年收租穩賺五厘，回報率隨時勝過港九工廈，但有業內人士提醒，出售迷你倉屬新興投資產品，市場未必有承接能力，若然遇到蠱惑租客在迷你倉內擺放違法物品，倉主可能賺錢不成反惹來一身蟻。
近月有商家將工廠單位改建成迷你倉，最低價倉位只售三十二萬元。
地產代理指將迷你倉獨立出售，是全港首創。
投資者將四千平方呎單位分拆成三十八個迷你倉，部分分契出售。
買樓好過
陳先生（學生）：迷你倉咁細個單位都唔知點用，如果有錢投資，都係會揀買樓。
洪先生（公務員）：都唔知分契入面會唔會有咩細則，如果個律師冇解釋清楚，買咗會好危險。
「工商迷你倉細單位是投資首選！」最近，有商人將工廈單位改裝成迷你倉出售，稱已透過繁複手續及法律程序，將有關單位分契，投資者可安心成為業主。本報記者佯裝顧客，參觀該工廈迷你倉，該單位於葵涌一工廈內，大廈樓齡為四十多年，單位仍在裝修，四千平方呎單位分拆成三十八個迷你倉，預計下月完工。
多走廊 實用率僅六成
負責銷售的物業代理聲稱，「面積細，入場門檻低，幾十萬就可以買到，葵涌依家係咁發展，業主都睇好個市，暫時只肯賣當中一半，即十九個倉位。」該物業代理不斷指，每個迷你倉建築面積由八十四平方呎至二百一十二平方呎不等，價錢由三十二萬至七十八萬元，呎價約三千六百多元至三千八百多元，但若以實用率僅得六成計算，呎價則約六千四百多元。「工廈多走廊，實用率本身唔高，加上分隔，點都會差少少。」
記者佯稱擔心購入迷你倉後，未必能成功找到租客出租，代理大派定心丸，「呢度靠近港鐵站，附近有商廈又有住宅，好多公司都會搵地方擺文件，住宅又有人搵倉放雜物，唔使擔心客源。」
除了現買現租外，代理更大力推介其「迷你倉託管計劃」：「呢個計劃，保證你首兩年每年有五厘回報，就算你租唔到出去，都會畀足租你，以三十二萬元倉位計，每月約可收千三蚊租金，一年差唔多有萬六蚊，回報率五厘。」根據差餉物業估價署公布資料顯示，今年新界工廈的平均呎租為九元四角，港島及九龍區工廈分別是十四元及十五元。相比起迷你倉呎租動輒十六元，利潤自然多一截。
不過，買家收取的租金並非可以全部落袋，由於迷你倉由管理公司統一管理，故此買家每月需額外繳交約二百多元服務、上網及保安等雜費。「迷你倉外圍有網絡攝錄機，可以畀業主監控情況，所以有上網費。」最後，代理促記者盡快決定購買與否：「入場費唔高，所以好受歡迎，開始咗一個禮拜，已經有成交。」
記者翻查資料，業主去年九月以八百五十一萬元購入單位，呎價為二千多元，根據代理所言，業主打算出售半數倉位，若能全部售出，即穩袋八百多萬元，收回購買成本外，還繼續持有其餘一半倉位。不過，業界對出售迷你倉生意有所保留。「出售迷你倉係投資產品，唔知市場會唔會接受，轉售時可能會有困難。」美聯工商部董事陳偉志擔心買家難以找到租客，「個倉自用就冇問題，但要租出去就麻煩，而且迷你倉租期未必好長，租金又低，好難有地產代理幫你搵客。」
個人擁有 搵客唔容易
儲存易迷你倉集團主席陳啟豪直言，除客源是一大問題外，買家自用亦不划算，「顧客搵迷你倉，會考慮個倉嘅管理服務，如果個倉係個人擁有，就好難搵到客，當然買家自用就問題唔大，不過佢每個月要畀管理費。」
迷你倉業主如果倉內出現違法貨品，業主更可能惹上官非，律師黃國桐表示：「業主要登記租客啲資料，問清楚擺咩貨，否則就係疏忽責任。」此外，他建議迷你倉買家勿用個人名義登記，「最好用有限公司登記，如果儲存啲貨品損壞，被租客追討賠償，買家都可以將間公司清盤，如果用個人名義持有，責任好容易『上身』。」
至於出售迷你倉的負責人接受本報查詢時，未有回應是否已向屋宇署入則，但稱事前有諮詢法律意見，其餘查問，則以業主繁忙為由，不便回覆。屋宇署則指已將問題交有關組別處理。
