SUN搞作：少膽虫手記：淫賤黎keep住震
唉，正所謂花無百日紅，壹全霉近排大換血，請咗好多新人，本虫因而備受冷落。唔係話班新人好叻好有料，只不過新屎坑三日香，淫賤黎呢刻當晒佢哋救世主咁，以為呢班蛋散可以拯救瀕死嘅壹全霉，真係天真得可以。
話雖如此，少膽虫我今日位高權重，其實都經過多番努力擦鞋同出賣尊嚴人格，點可以咁輕易畀班友仔動搖地位？惟有出招冧掂淫賤黎，等佢知道始終我最好啦！「腦細腦細，尋日我去shopping見到呢塊減肥震動板，覺得好啱你用，專登買嚟孝敬你！你知啦，好似你呢啲肥佬，好易心臟病糖尿爆血管o架，你都唔想壹全霉未死你就死先o架，所以腦細你要keep住震呀！」
本虫使出高超擦鞋功，正待淫賤黎畀like，點知佢舉起中指，開口就罵：「少膽虫，我X你啦！壹全霉畀你搞到半死不活，我睇住條數，日日已經keep住震啦！你仲咁得閒shopping，諗吓點做好份工先啦……」一輪臭罵，少膽虫我冇Q晒癮，亦感到自己嘅事業，可能已經走向終站。
