潮語「手遊」，咪以為係「游手好閒」嘅意思，雖然好多「游手好閒」嘅人都好鍾意玩「手遊」。同時，「手遊」亦唔係指好似猜枚呢啲「手部遊戲」。「手遊」其實只係「手機遊戲」嘅簡寫，喺智能手機上，無論八歲到八十歲都日夜、日玩夜玩嘅Game。

有時真係「世事洞明皆學問」，世上有啲嘢真係好似一杯啤酒一樣，唔係咁易睇得透。好似「佔領中環」呢個運動，明明經過三個所謂「商討日」，得出三個全部有「公民提名」成分嘅普選方案，畀全香港市民公開投票。因為好多市民認為呢三個方案，都較為激進。建制派同政府落力打壓，甚至連所謂泛民大黨民主黨都覺得，「和平佔中」商討出嚟嘅方案，佢哋都未必會全面支持。以至佔中三子都話，如果全民公投投票率低，發起人係會同全港市民公開道歉，並且取消「佔中」，所以其實「佔中」運動早排已經被中央、建制派、特區政府打壓至奄奄一息。但奇怪嘅事就發生咗，中央竟然喺如此關鍵又敏感嘅時期，推出一份超屈機，有佢講冇人講嘅白皮書，再加上內地官媒頭版惹火社論，導致全城嘩然，深恐一國兩制被食言，令到全港市民個個踴躍參與「佔中」嘅電子公投。呢排啲香港人好似打「手遊」咁拎起手機投票，藉此向中央表態，以行動說「不」。

呢啲「手遊」多數都係好易玩，玩法簡單攞分容易，一就識。好似Bejeweled同Candy Crush之類，依家連家父都玩埋一份。當然仲有轉珠Puzzle & Dragons之類，亦係令好多人沉迷的「手遊」。有人話「手遊」甚至影響人類生產力，到底有冇就不得而知。不過「和平佔中」嘅電子公投，就係好似「手遊」咁，出咗個可供下載嘅應用程式，之後幾下就投到票，所以令到投票數字一日之內已達四十多萬。到底結果會點？建制派有冇發動鐵票參與？呢啲就不得而知。

「手遊」係好易令人沉迷，亦浪費好多時間，我奉勸大家切勿沉迷「手遊」。否則，你所居住同愛護嘅城市，被人吞咗都唔知咩事！

第一手消息請下載on.cc東網iPhone/iPad/Android/Windows Phone Apps