政壇：搞搞政：張建宗搵夠腳副局齊人
政府呢個「熱廚房」近年有跳船潮，亦有新人趕科場，據聞政府現有嘅最後一個副局長空缺、勞工及福利局副局長終於搵到合適人選喇，局長張建宗搵齊腳，真係飲得杯落。至於最快喺今年暑假成立嘅創新及科技局，三個政治委任職位包括局長、副局長同政治助理，據聞亦有好多人爭住做，可能連同勞福局副局人選一次過公布，令副局問責團隊歷史性首次齊班。
設計圖片及對白
勞福局副局長長時間缺陣，係咪因為張建宗揀擇呢？知情人士解釋，查實係呢個副局長人選認真唔易揀，揀熟悉勞工界嘅人，好容易會被資方質疑偏幫打工仔，對於該局處理最低工資檢討、標準工時立法、擴大輸入外勞，以及取消強積金對沖機制等勞資雙方有強烈分歧嘅議題，可能會不利；揀有社福界背景嘅人，社福界又山頭林立，如果副局長人選同某派社福團體關係過分密切，又有手尾，據講，之前就有應徵者係因此而落選喇。
至於創科局，熱門局長人選依舊係傳咗足足兩年嘅理工大學副校長楊偉雄，副局長傳聞人選就多囉，幾乎所有稍有知名度嘅建制派IT人都傳過。據聞有人更向政府表明，如果冇得做副局長，低級啲嘅政治助理都照殺，好似求官心切咁。
