由一班青年人創立嘅香港青少年領袖發展協會，尋日喺港大搞咗新一屆領袖計劃開幕禮，並邀請到民政事務局政治助理徐英偉（Caspar）及香港社區組織協會幹事施麗珊做嘉賓，佢哋仲喺研討會上大講新移民問題。不過，Caspar發言之後，施麗珊就話替佢感到辛苦，仲話佢呢份工好難打喎。不過聽真啲，似乎係寸政府多啲喎。

當時Caspar率先發言，一向好熟書嘅佢就好似「唸書」咁非常詳細講出政府協助新移民嘅政策，當中包括新移民人數、以及民政事務總署有關新移民來港後感受嘅問卷調查等。之後輪到施麗珊發言，佢笑笑口話，Caspar呢份工真係辛苦，因為政府都冇專門協助新移民嘅服務，但Caspar竟然可以講足十分鐘咁耐，講到好似政府做咗好多嘢咁喎。原來施麗珊呢一句，唔係真係同情Caspar，而係擺明寸政府。

第一手消息請下載on.cc東網iPhone/iPad/Android/Windows Phone Apps