政壇：翟少自爆屋企冇發言權
剛卸任監警會主席嘅資深大律師翟紹唐（翟少）早前話要撥多啲時間陪家人，轉個頭就見佢同太太出席一個活動，佢話減少一項公職後，嚟緊都要專注處理最低工資委員會嘅工作。上庭時雄辯滔滔嘅佢，喺屋企又點呢？翟少自爆，喺家中太太永遠係大晒嘅，佢冇發言權，所以唔需要同太太爭論喎。
翟紹唐（右）話喺屋企老婆大晒，唔會爭論。
講番早前佢接受電台訪問時，曾用違例泊車比喻佔領中環行動，佢話雖然佔中係違法，但參與者願意接受法律制裁，所以唔影響法治喎，佢透露，舉呢個例子事前並冇預先諗好，只係即場爆肚。講到大狀嘅工作，佢曾經接過同食肆有關嘅官司，咁樣同太太行街時，係咪有啲食肆唔去得？佢就話的確係咁，但佢一定心裏有數，好似中環某食肆咁，佢至今都唔可以踏足，而灣仔有間「富豪飯堂」一分為二後，佢就可以去新嗰間嘞。
