政壇：搞數碼電視 港台狂燒錢
香港電台早前想向政府申請六十億元，喺將軍澳興建新大樓，畀立法會議員狂批太貴，打番轉頭。一間新大樓都話要六十億元，重建瑪麗醫院都係差唔多價錢，可見港台真係大花筒。港台要起新大樓，其中一項工作就係發展數碼電視頻道，呢個大計雖惹來外間質疑，尤其係對佢哋嘅收視率、甚至廣播需要都有疑問，點知仲未見效益，納稅人已經被劏一刀，因為港台要用公帑四出租寫字樓，睇嚟廣播處處長鄧忍光真係要好好學吓乜嘢係勤儉之道！
設計圖片
遍布港九新界
港台今年初開始三條數碼電視頻道廣播，依家新大樓興建無期，數碼廣播已經擴展，只好花公帑四出租用寫字樓。
有港台中人話，依家數碼電視控制室只能容身於電視大樓幾百呎嘅「豆腐膶」地方，媒體資產管理同事負責將港台舊資料數碼化，更要分布喺上環同西貢返工，加埋九龍塘港台現址，搞到港九新界都有港台辦公室。
港台話，佢哋一一年開始租用上環林士街海港政府大樓，約四百呎地方擺放錄影帶以及少量機器，之後一年就打西貢政府合署主意，租用接近一千呎地方，等技術人員同承建商做媒體資產管理。兩個地方分別有二十名員工返工，如果港台職員要搵舊片，隨時要搭車去攞。
除咗媒體資產管理，港台電視部同行政部有百多名同事，早於一○年就喺九龍塘創新中心兩層合共千五呎地方辦公，但咁都未夠，皆因政府洽商緊喺旺角商業大廈租用辦公室，港台希望今年底再搬啲部門過去。睇嚟港台為咗搞數碼電視廣播頻道，真係使咗唔少公帑，但到底係咪物有所值呢？
