市區重建蝕本 最怕無以為繼
不出所料，市建局又呻窮喇。繼早前放風指「需求主導計劃」蝕大本之後，市建局尋日公布上年度嘅財政狀況，聲稱虧損二十三億元，係五年來首次出現赤字。咁又難怪嘅，近年重建一項蝕一項，唔乾塘至奇。
嗱，市建局主席蘇慶和係咁講嘅，由於深水埗海壇街及觀塘收樓遇阻，兩個項目原定上年度招標，結果搞到家陣都未有下文，進度嚴重落後，拖累市建局首次錄得赤字。佢仲話，現時收購成本每呎最少要一萬元，加上建築成本由過去每呎約二千元暴漲至四千元，如果未來幾年地產市道下調，就會對財政造成更大壓力喎。
咁講啦，市建局出現虧損，其實都係意料中事，重建項目來來去去都係牙籤樓，規模細，單位少，完全冇經濟效益可言，唔虧損至奇喇。就以現正進行嘅八項需求主導重建項目嚟講吖，幾乎清一色單幢式牙籤樓，收購成本高，落成單位少，簡直係起一幢蝕一幢。所以話啫，單靠市建局推動市區重建，效率低不特止，財政亦遲早無以為繼咋。
即係咁，市建局嘅重建項目零敲碎打，對增加房屋供應杯水車薪，亦未能改善社區及交通等配套設施，完全失去市區重建嘅意義。更搞笑嘅係，市建局為封蝕本門而開倒車，計劃收緊需求主導計劃門檻，除咗地盤面積最少要有六百平方米，仲由原本只需六成七業主同意提高到八成。咁搞法，即係打擊舊樓業主重建意欲，令舊樓問題更加惡化啫。
大家都知，好多舊區環境惡劣，目前樓齡逾五十年嘅舊樓有數千幢，多數係日久失修，又有安全隱患，舊樓重建可以話係刻不容緩。可惜市建局獨力難支，以致舊區重建龜行牛步，事倍功半，再咁落去，難保塌樓死人慘劇不會重演o架。
港府口口聲聲將房屋問題列為施政重中之重，一時寸土必爭，一時見縫插針，結果講多過做，至今毫無寸進。本來呢，要增加房屋供應，加快市區重建不失為一個最直接最有效嘅辦法，既可改善居住環境，亦可消除安全隱患，阻力亦唔似得發展新界東北咁大，起碼唔會搞到千人「佔領」立法會咁混亂，點解當局偏偏要捨易取難呢？
正如古人話齋：不謀全局者，不足以謀一域。市區重建必須全盤規劃，綜合發展，單靠市建局之力，根本難以成事。港府年前為市建局注資一百億元，點知一年就蝕咗二十三億，照咁睇，日後可能仲要不斷泵水，既然係咁，何不索性由港府出面主導重建呢？叮！
