SUN搞作：打橫嚟講：差人，都係社會一分子啫！
同個警察哥哥仔飲嘢吹水。
傾到興起，一講到香港近期局勢，佢仲勞氣過我，媽媽聲爆粗（差人的粗口，真係好得沒有再好），兼且呻到樹葉都落晒。
呢位正氣的警察哥哥仔話佢當日投身警隊，都只因想服務市民、除暴安良、維持法紀、伸張正義啫！點知，警隊內好黑暗，衰啲講，同老黑社團無分別！
佢以上星期立法會外的亂局作例，明明係那財委會主席吳亮星係要夾硬表決，才令本來乖乖坐喺外邊的群眾起哄，原罪係政府漠視民意；依家，矛頭全撥指示威者，好等同六四，若非大陸政府嚴重貪腐內鬥，又怎會有學生在天安門廣場絕食，跪求政治改革吖？
嘩呀！你當差嘅喎！
佢仲爆少許內幕，話立法會外示威群中，已有不少「臥底」匿藏其中，我覺得好正常啫！佢話，有人聽令「刻意」撥火的！唔係呀？咁很賤？佢好不忿氣地說，既然民眾都坐番低晒，又無再衝擊，警方又何須「清場」呢？原來係「阿頭」指令：人哋作「七一預演」，我哋亦來一次「操練」喎！咁咪等兩點半後，啲報紙截晒最後一稿時便「開拖」囉！佢還語重心長地說，被抬走的人，不要在傳媒cover（看到）唔到時掙扎或反抗呀！因「上頭」有吩咐，好好招呼佢哋o架！輕則扮唔夠力抬人，突然鬆手，等示威仔撻生魚咁撻落地；重手的則暗暗拗人手腳關節和鎖喉捽眼，要你受傷，或特登拖拉，等你手腳擦到地下……（先旨聲明，此乃一家之言，信不信由你）
佢最後話，佢都係香港一分子，家人親戚也同樣受着社會不公義的煎熬，有市民上街爭權益，是正常好事，何解竟被賤招對付？我看着他，我心傷！但慶幸，警隊中仲有個正常人，而且係個有正氣和懂思考的年輕人。
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊（目及）實政府
