政壇：搞搞政：中總大搞七一消費優惠
舊年首次搞七一消費優惠嘅全港各區工商聯（工商聯），因被指有商戶臨時打退堂鼓，而部分商戶則於當日關門休息，掀起過一陣風波，更有人話商戶嘅優惠貴過團購價等等。雖然眾說紛紜，但亦無損各商會今年再搞同類型優惠活動嘅興致。香港中華總商會（中總）尋日開記者會宣布，七一期間將與多個商戶合作提供折扣優惠吸客，仲講到明係「真優惠」，兼且唔會甩底咁話！
設計圖片及對白
今年中總與七十個品牌、近一千間店舖及食肆合作，喺六月二十六日至七月二日期間提供消費優惠。喺咁敏感嘅時候提供優惠，梗係被問同七一有乜關係啦，會長楊釗就話並無政治考慮喎，又否認計劃係為七一遊行降溫。佢話四月份零售額下跌約百分之九，所以商戶其實無論任何時候都搵緊機會促銷。
至於事前有冇同工商聯商討過，主席李應生就指，各個機構都有自己嘅活動，唔需要下下同其他機構商討，佢哋亦唔想批評或同其他機構比較，只知無論邊個機構舉辦都係想刺激零售業消費，市民亦可受益。佢之後仲逐個詢問在場嘅商戶代表，確認佢哋到時一定唔會甩底。除咗佢自己公司會喺期間出售一萬個每個一元嘅羅漢果，亦有參與酒樓會提供每人限叫一籠嘅一元點心。
