政壇：何鍾泰疑寸星爺冇耐性
近排立法會財務委員會就審議新界東北發展區前期工程撥款搞到立立亂，財委會主席「星爺」吳亮星涉嫌濫權「剪布」成眾矢之的，政府亦被指諮詢不足遭炮轟。曾出任立法會議員十六年嘅何鍾泰以過來人身份贈兩句，坦言坐得委員會主席個位，就要任由委員發表意見，又認為政府應該畀多啲耐性同居民溝通，亦要提高諮詢透明度，難怪依家民意反響咁大喇。
何鍾泰
身兼大舜政策研究中心主席嘅何鍾泰尋日出席發布會時，講起立法會近日嘅亂局，曾兼任工務小組委員會主席嘅佢認為，只要委員會同事發言唔重複、唔離題都應該畀佢哋講，唔可以因為要開多幾次會，或者要通宵開會就「硬闖」表決。唔通佢想暗寸星爺冇耐性，粗暴「剪布」有佢講冇人講？佢即時否認，強調唔批評政府、政黨或議員o架。
