大嶼規劃藍圖美 最怕又煲無米粥
清朝曾國藩「屢敗屢戰」嘅典故，相信大家早已耳熟能詳。佢當年同太平軍作戰，打咗幾次大敗仗，喺上疏皇帝嘅奏折裏面承認自己「屢戰屢敗」，有幕僚勸佢改為「屢敗屢戰」，改變皇帝對佢無能膽怯嘅觀感，最終真係畀佢打贏喎。照咁睇，今時今日港府拓土建屋都係屢敗屢戰，或者有翻身嘅希望嘞。
即係咁，新界東北發展計劃陷入泥沼，打咗敗仗嘅發展局局長陳茂波心有不甘，準備另闢戰場再打過，佢近日透露大嶼山發展計劃進展，仲話有四大策略性定位添，即係大珠三角地區國際運輸、貿易及服務樞紐中心、新都會及核心商業同住宅，以及發展保育、娛樂同旅遊，一旦計劃落實，大嶼山可以容納五十萬人居住，比東涌原本規劃嘅三十萬人多一大截喎。
學古人話齋，先生之志大矣。問題係港府官僚講就天下無敵，做就有心無力，波波局長會唔會又係畫餅充飢呢？冇錯，大嶼山好似未經雕琢嘅璞玉渾金，發展潛力無限，多年嚟各界亦獻過唔少計，包括起大型商業城又或者建賭場，而早喺老董時代，港府就委任財政司司長唐唐，掛帥研究大嶼山發展策略，可惜吖，唐唐掛住喺自家地下掘窿，懶理大嶼山，結果十幾年眨吓眼過咗去，發展大嶼山都係得個講字。港府家陣又話四大定位，又話乜中心物樞紐，吹得天花亂墜，會唔會又係煲無米粥o架？
好難怪太一叮唔對港產官僚嘅能力「疑中留情」喎。就講番新界東北發展計劃吖，討論咗咁多年，民調亦顯示逾八成市民支持計劃，弊在一小撮激進政客同團體人數少聲音大，議會內搞拉布，議會外搞衝擊，搞到立法會相關審議次次腰斬，淨係前期撥款都唔知拖到何年何月，遑論將整個計劃付之實施。你話嘞，有民意支持嘅新界東北發展尚且搞到一鑊泡，而發展大嶼山嘅規模同爭議，有過之而無不及，試問港產官僚有咩符擺平先？
話時話，港府拓土建屋大計唔少o架，由填海造地到見縫插針，由寸土必爭再到東北發展，可惜鋪鋪都係寸步難行。仲話乜嘢解決房屋問題係施政重中之重喎，不堪承受之重就真。
房屋問題搞到今日尾大不掉，冇錯係前朝留低嘅蘇州屎，而今日社會泛政治化，少數激進勢力騎劫大多數人利益，都係不爭嘅事實，但咁唔代表政府可以下巴輕輕，無所作為吖嘛。
嗱，唔理你「屢戰屢敗」又好，「屢敗屢戰」都好，正所謂敗軍之將難言勇，港府點都要洗刷吓污名至得o架，叮！
