城中鏡：鄧宣宏雁設計百卡鑽鏈
前晚喺一個音樂會見到太子珠寶鐘錶主席鄧鉅明嘅太太宣宏雁，佢話仔仔為預備父親節禮物而早喺半個月前開始製作。咁係乜嘢禮物？佢話：「係陶瓷，佢專登出去學，因為佢鍾意手工藝，佢覺得親手做，爸爸會感覺到佢好愛佢，同埋個仔話自己仲讀緊書，冇錢買禮物住。」佢坦言仔仔好有藝術天分，亦都有學畫畫，問到仔仔有冇講過將來要做藝術家時，佢話：「仔仔話想做律師。」
宣宏雁
戴上鑽飾嘅鄧太分外明艷高貴，佢話單係鑽石頸鏈已有逾百卡，係自己親自設計嘅。
問到會唔會出售自己設計嘅系列時，佢就話嘗試中，希望會有成績。至於會唔會修讀珠寶設計課程？佢話：「唔會，我太忙，但我有構思諗到會同設計師講。」有冇幫未來新抱諗定設計款式？佢話：「唔諗住，到佢哋結婚時新抱都有新嘢啦。男友送畀佢會更開心同更甜！」
